Cefndir PONT:
Mae PONT yn gweithio gydag unigolion a sefydliadau i gyflwyno trefn bori briodol er lles bywyd gwyllt, ar safleoedd unigol ac ar lefel leol a rhanbarthol. Gwelir enghreifftiau o sut mae PONT wedi helpu i ddarparu atebion pori llwyddiannus ar y tudalennau Prosiectau a Gwybodaeth.
Yn ychwanegol at gynnig atebion ar y tir, mae PONT yn casglu ac yn rhannu gwybodaeth am gynlluniau pori lleol ac esiamplau o arfer gorau. Hefyd mae PONT yn gweithio i sicrhau bod pwysigrwydd anifeiliaid pori wrth reoli cynefinoedd er lles bywyd gwyllt yn cael ei gydnabod ar bob lefel. Mae cynrychiolwyr PONT yn aelodau o grwpiau ecosystemau Partneriaeth Bioamrywiaeth Cymru, yn ogystal â Plant Link Cymru.
Mae PONT yn cynnal cyrsiau hyfforddi ar gyfer gweithwyr proffesiynol a gwirfoddolwyr yng nghefn gwlad, fel archwilio stoc a bugeilio manwl. Trefnir digwyddiadau ar gyfer y cyhoedd sy’n rhoi sylw i faterion fel rheoli cŵn, cerdded gyda da byw a rheoli dolydd gwair mewn partneriaeth â sefydliadau eraill. Gweler ein tudalen ni ar Facebook a’r dudalen Newyddion i gael rhagor o fanylion.
Mae PONT yn ceisio cyfrannu gwybodaeth at bolisïau’r llywodraeth ar faterion amgylcheddol a chefn gwlad ehangach, a dylanwadu arnynt. Sylfaenwyd PONT yn 2005 gan y chwaraewyr allweddol yn y byd cadwraeth natur ac amaethyddiaeth yng Nghymru ac wedyn, yn 2010, cafodd ei ymgorffori fel cwmni dielw cyfyngedig trwy warant. Mae PONT yn cael cefnogaeth a chyfraniad gan amrywiaeth o sefydliadau ledled Cymru, gan gynnwys tri sefydliad cadwraeth, Llywodraeth Cymru, Cyfoeth Naturiol Cymru, awdurdodau Parciau Cenedlaethol, cymdeithasau bridiau brodorol ac undebau ffermio. Cefnogir PONT yn ariannol gan Lywodraeth Cymru.
